ពត៌មានចុងក្រោយក្នុងដៃអ្នក: ប្រជាពលរដ្ឋចំនួន៨១គ្រួសារសម្រុកចូលកាន់កាប់ និងសង់លំនៅឋានក្នុងមូលដ្ឋានឃ្លាំងស្តុកសម្ភារៈកងទ័ពនៅជើងភ្នំក្រោម

បញ្ចូលអត្ថបទ ៖ ផ្កាយព្រឹក

ថ្ងៃពុធ ទី២២ ខែកក្កដា ឆ្នាំ២០១៥ ម៉ោង ០៨:៥៥

ខេត្តសៀមរាប ៖ ប្រជាពលរដ្ឋចំនួន៨១គ្រួសារដែលរស់នៅភូមិភ្នំក្រោម សង្កាត់សៀមរាប ក្រុង-ខេត្តសៀមរាប បាននាំគ្នាបុកបារ៉ាស់យោធា សម្រុកចូលទៅកាន់កាប់ និងសាងសង់លំនៅឋាននៅក្នុងមូលដ្ឋានទីតាំងរក្សាគ្រឿងសព្វាវុធរបស់អង្គភាពយោធភូមិភាគទី៤ ដែលស្ថិតនៅជើងភ្នំ(ភ្នំក្រោម) ជិតមូលដ្ឋាននៃប្រជាពលរដ្ឋទាំងនោះរស់នៅតែម្តង ។

រដ្ឋបាលក្រុងសៀមរាបបានចេញសេចក្តីជូនដំណឹងលេខ១៤៧ សជណចុះថ្ងៃទី២១ កក្កដា ២០១៥ ផ្ញើជូនទៅប្រជាពលរដ្ឋដែលបានធ្វើសកម្មភាពខាងលើ ពិសេសជំរាបជូនទៅតំណាងប្រជាពលរដ្ឋទាំងនោះផងដែរ។

រដ្ឋបាលក្រុងសៀមរាបបានចេញសេចក្តីជូនដំណឹងនេះ ដោយយោងតាមលិខិតផ្ញើជូនរបស់យោធភូមិភាគទី៤ លេខ ១៩៥/ ២០១៥ ចុះថ្ងៃទី១៨ កក្កដា ២០១៥ ។ នៅក្នុងលិខិតរបស់រដ្ឋបាលក្រុងសៀមរាប បានចាត់ទុកថា សកម្មភាពនោះគឺជាទង្វើខុសច្បាប់ ព្រោះទីតាំងឃ្លាំងសព្វាវុធរបស់កងទ័ព ចាំបាច់ត្រូវរក្សាការពារយ៉ាងតឹងរ៉ឹងបំផុត និងមានសារសំខាន់ ក្នុងបុព្វហេតុការពារមាតុភូមិ ការពារសន្តិសុខជាតិ ។

លិខិតរបស់រដ្ឋបាលក្រុងបានសំណូមពរ សូមឲ្យប្រជាពលរដ្ឋទាំងនោះរុះរើខ្ទម និងលំនៅឋានដែលបានសាងសង់ក្នុងតំបន់ការពាររបស់កងទ័ពនោះដោយកំណត់រយៈពេលត្រឹមថ្ងៃទី២៦ កក្កដា ២០១៥ ខាងមុខនេះជាកំហិត៕

ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព